ТАҶЛИЛИ РӮЗИ МОДАР ДАР ФАКУЛТЕТИ СТОМАТОЛОГӢ
Бо ибтикори факултети стоматологӣ дар ҳамкорӣ бо кафедраи ҷарроҳии ҷоғу рӯй бахшида ба Рӯзи Модар дар фазои тантанавӣ чорабинии фарҳангиву маърифатӣ баргузор гардид. Ҳадафи асосии чорабинӣ арҷгузорӣ ба мақому манзалати модар, гиромидошти нақши занону модарон дар ҷомеа ва баланд бардоштани ҳисси эҳтиром ба ин шахсияти муқаддас дар миёни донишҷӯён ва омӯзгорон арзёбӣ гардид.
Дар оғози чорабинӣ намояндагони роҳбарияти донишгоҳ ва факултет суханронӣ намуда, ҳозиринро ба муносибати Рӯзи Модар самимона табрик карданд. Зимни суханрониҳо таъкид гардид, ки модар сарчашмаи муҳаббат, тарбия ва ахлоқи наку буда, нақши ӯ дар ташаккули шахсият ва пешрафти ҷомеа бисёр бузург аст. Қайд карда шуд, ки дар ҷомеаи имрӯзаи Тоҷикистон арҷгузорӣ ба занону модарон яке аз арзишҳои муҳими фарҳангӣ ба шумор меравад.
Дар идомаи чорабинӣ донишҷӯён бо барномаҳои фарҳангӣ, аз ҷумла қироати шеърҳо, иҷрои сурудҳои дилнишин ва саҳначаҳои тарбиявӣ хотири ҳозиринро болида гардониданд. Баромадҳои ҳунарӣ бештар ба васфи модар, муҳаббат ва эҳтироми фарзанд нисбат ба ӯ бахшида шуда буданд. Ин барномаҳо фазои гарму самимӣ ба вуҷуд оварда, дар дили иштирокдорон эҳсоси қадршиносӣ нисбат ба модарро боз ҳам бештар намуд.
Ҳамзамон дар чорабинӣ саҳми занону модарон дар рушди соҳаи тиб ва фаъолияти онҳо дар тарбияи насли солим махсус таъкид гардид. Зикр шуд, ки занони соҳаи тиб бо масъулиятшиносӣ ва меҳнати содиқона дар ҳифзи саломатии ҷомеа нақши муҳим доранд.
Дар фарҷоми чорабинӣ роҳбарияти донишгоҳ ва факултет бори дигар ҳамаи занону модаронро бо ин рӯзи фархунда табрик гуфта, ба онҳо саломатии бардавом, хушбахтӣ ва комёбиҳои нав дар фаъолияти касбӣ ва зиндагии шахсӣ таманно намуданд. Чорабинӣ дар фазои гарму идона анҷом ёфта, дар дили иштирокдорон таассуроти нек боқӣ гузошт.
Факултети стоматологӣ
