Конститутсия ҳамчун қонуни асосии давлат дар муайян намудани сохтори сиёсӣ, низоми ҳуқуқӣ ва самтҳои стратегии рушди ҷомеа нақши калидӣ дорад. Дар Ҷумҳурии Тоҷикистон ин санади муҳими ҳуқуқӣ заминаи ташаккули давлатдории соҳибистиқлол, муайян намудани принсипҳои асосии идоракунии давлатӣ ва танзими муносибатҳои ҷамъиятиро фароҳам овардааст.

Қабули Конститутсияи Ҷумҳурии Тоҷикистон яке аз рӯйдодҳои муҳими таърихи навини кишвар ба ҳисоб меравад. Он ифодаи иродаи халқ дар муайян намудани роҳи рушди давлат ва таҳкими асосҳои ҳуқуқии ҷомеа буда, барои ташаккули низоми муосири давлатдорӣ заминаи устувор гузошт.

Конститутсияи Ҷумҳурии Тоҷикистон 6 ноябри соли 1994 тавассути раъйпурсии умумихалқӣ қабул гардид. Ин рӯйдод дар шароити мураккаби сиёсӣ ва иҷтимоии кишвар ба вуқӯъ пайваста, дар муайян намудани самти минбаъдаи рушди давлат аҳамияти бузург дошт. Қабули Конститутсия барои ташаккули низоми мустақили ҳуқуқӣ, муайян намудани асосҳои сохтори давлатӣ ва муқаррар намудани принсипҳои фаъолияти мақомоти ҳокимият шароити зарурӣ фароҳам овард.

Рушди ҷомеа ва тағйир ёфтани муносибатҳои сиёсиву иҷтимоӣ зарурати такмили меъёрҳои конститутсиониро ба миён меорад. Ба Конститутсияи Ҷумҳурии Тоҷикистон 26 сентябри соли 1999, 22 июни соли 2003 ва 22 майи соли 2016 тавассути раъйпурсии умумихалқӣ тағйиру иловаҳо ворид карда шуданд. Ин раванд марҳилаҳои муҳими рушди низоми конститутсионии кишварро инъикос намуда, аҳамияти мутобиқсозии заминаи ҳуқуқии давлатро ба талаботи давру замон нишон медиҳад. Ҳамзамон, тағйиру иловаҳо бояд дар доираи тартиби муқаррарнамудаи худи Конститутсия амалӣ карда шаванд.

Дар шароити ҷаҳонишавӣ ва густариши муносибатҳои байналмилалӣ аҳамияти Конститутсия дар муайян намудани мавқеи ҳуқуқии Тоҷикистон дар ҷомеаи ҷаҳонӣ низ зоҳир мегардад. Эҳтироми ҳуқуқи инсон, эътирофи арзишҳои умумибашарӣ ва рушди ҳамкориҳои байналмилалӣ барои таҳкими муносибатҳои байнидавлатӣ ва ҳифзи манфиатҳои миллӣ мусоидат менамоянд. Ҳамоҳангии сиёсати дохилӣ бо уҳдадориҳои байналмилалии давлат дар доираи меъёрҳои ҳуқуқӣ яке аз омилҳои муҳими рушди устувори кишвар ба шумор меравад.

Ҳамин тариқ, аҳамияти сиёсию ҳуқуқии Конститутсия на танҳо дар муқаррар намудани меъёрҳо, балки дар татбиқи амалии онҳо дар ҳаёти давлат ва ҷомеа ифода меёбад. Риояи қонун, фаъолияти масъулонаи мақомоти давлатӣ ва иштироки бошууронаи шаҳрвандон омилҳои асосии таҳкими давлатдории ҳуқуқбунёд ва рушди устувори Тоҷикистон мебошанд.

Рухшонаи Ҳакималӣ.-

ассистенти кафедраи технологияи фарматсевтӣ

ба номи профессор Халифаев Д.Р.