1.     Дар бахши ҷарроҳии ОИТ ва амалияи ҷарроҳӣ тибқи нақшаи пешбинишуда, аъзоёни Маҳфили илмии донишҷӯён-и курси 3-юм таҳти роҳбарии Баҳромов М.Б. ва кормандони озмоишгоҳ барои омӯзиши техникаи ҷарроҳӣ ва омода намудани минтақаи ҷарроҳишаванда, машғулиятҳои омӯзишӣ ва фаҳмондадиҳӣ баргузор намуданд. Илова бар ин, ду амалиёти ҷарроҳӣ дар мавзӯи “Лапаротомия: назаргузаронии узвҳои ковокии сифоқпарда ва аппендэктомия” дар харгӯшҳои таҷрибавӣ анҷом дода шуд.

2.     Тибқи нақшаи солонаи фаъолияти озмоишгоҳ ва бо мақсади пешгирии бемориҳои пӯст ва зарари ҳашаротҳо, ки дар фаслҳои гарми сол зиёд мешаванд, тамоми ҳуҷраҳои ҳайвоноти озмоишӣ бо маводи Креолин дар вояҳои муқарраргардида безарар гардонида шуданд. Ин мавод дар дохил ва гирду атрофи ҳуҷраҳои нигоҳдории ҳайвоноти озмоишӣ пошида шуда, чораҳои беҳдоштӣ пурра амалӣ гардиданд.   

3.   Давоми ҳафта донишҷӯёни курси 3-юми факултети педиатрӣ дар дарсҳои амалӣ барои омӯзиш ва рушду сайқалдодани донишу малакаи худ аз фаъолияти Озмоишгоҳи морфологӣ, физиология ва патологияи эндотелия дидан намуданд. Дар рафти экскурсия, онҳо бо биомаводҳои баъд аз ҷарроҳӣ, аз қабили долихосигма, носур, миомаи бачадон, кистаи гардан ва БСС ошноӣ пайдо карданд, ҳамчунин техникаи кор бо асбобҳои ҳозиразамонро омӯзиш намуданд. Ходими калони илмӣ, н.и.т., дотсент Тағойқулов Э.Х., донишҷӯёнро бо таърихи таъсиси озмоишгоҳ шинос намуданд ва дар бораи мақсади таҳқиқоти патогистологӣ ва намудҳои он маълумот доданд. Ҳангоми буриши маводҳои баъд аз ҷарроҳӣ, онҳо дар бораи патологияи бофтаҳо маълумот гирифтанд. Дар охир, донишҷӯён дар бораи таҳқиқоти макроскопии бофтаҳои пешниҳодшуда пурра маълумот касб карданд.

Пажӯҳишгоҳи тибби бунёдӣ