Тантанаҳо бахшида ба Рӯзи модарон
Эҳтироми модар ва қадрдонии бонувон қарзи ҳар як инсони бонангу номус аст. Зан-модар рамзи баҳори пурнакҳат ва сабзу хуррам мебошад. Модар нахустмураббии башарият ба шумор рафта, тарбияи инсоният аз домони поки ӯ сарчашма мегирад.
Хушбахтона, бо ташаббуси Асосгузори сулҳу ваҳдати миллӣ, Пешвои миллат, Президенти ҶТ муҳтарам Эмомалӣ Раҳмон имрӯзҳо мақому мартабаи занон дар ҷомеа беш аз пеш баланд бардошта шуда, баробарҳуқуқии комили занону мардон дар кишвар ҳукмфармост. Ва дар тамоми вазорату идораҳо, ташкилоту корхонаҳо ин баробарҳуқуқӣ бараъло ба чашм мерасад.
Имрӯзҳо хизмати зан-модар дар тамоми самтҳои фаъолият назаррас аст. Мавқеи зани тоҷик дар тамоми корҳои давлатию ҷамъиятӣ ба таври мусбат арзёбӣ мешавад.
Ба муносибати таҷлили “Рӯзи Модар” ва ба хотири эҳтирому гиромидошти модарон ва бонувон, санаи 06.03.2020 дар толори “Сино”-и МДТ “ДДТТ ба номи Абӯалӣ ибни Сино” ҷамъомади идонаи фарҳангие бо иштироки Вазири тандурустӣ ва ҳифзи иҷтимоии Ҷ.Т.-Олимзода Насимҷон Хоҷа, Ректори ДДТТ ба номи Абӯалӣ ибни Сино-Гулзода М.Қ., кормандони Вазорати тандурустӣ ва ҳифзи иҷтимоии аҳолии Тоҷикистон ва МДТ “ДДТТ ба номи Абӯалӣ ибни Сино” баргузор гардид.
Чорабинӣ бо сухани табрикотии Вазири тандурустӣ ва ҳифзи иҷтимоии Ҷ.Т.-Олимзода Насимҷон Хоҷа оғоз гардид. Насимҷон Хоҷа дар рафти суханронии худ оид аз дастовардҳои назарраси бонувони кишвар, ба хусус кормандони соҳаи тиб ёдоварӣ карда, таъкид сохтанд, ки занон чароғи хонадон ва пешбарандаи хиради инсонианд. Арҷ гузоштан ба садоқату вафодории модарон қарзи ҳар як фард ба ҳисоб меравад. Дар интиҳои суханрониаш Олимзода Н.Х. тамоми занони толор ва дар симои онҳо кулли модарону бонувони кишварро ба муносибати ҷашнашон муборакбодӣ намуда, 31 нафар кормандони собиқадори Вазорати тандурустӣ ва ҳифзи иҷтимоии аҳолии ҶТ ва МДТ “ДДТТ ба номи Абӯалӣ Сино”-ро бо туҳфаҳои хотиравии Асосгузори сулҳу ваҳдати миллӣ, Президенти ҶТ Эмомалӣ Раҳмон сарфароз гардонид.
Сипас, баҳри болидасозии хотираи аҳли толор, ба хусус бонувон дастагули омода намудаи шуъбаи фарҳанг ва дастаи ҳунарии “Шифо”-и донишгоҳ, ки аз суруду таронаҳои марғуб ва рақсҳои ҷаззоб иборат буд, давоми як соат танинандоз шуд. ва боиси хуш пазируфтани ҳозирин гардид. Ба хусус, сурудҳои “Аллаи модар” ва “Шукри обат”-и аз ҷониби донишҷӯдухтари ҳинду – Гифти Селвираҷ сароида шуданд, ба аҳли толор хуш омад.
Шуъбаи фарҳанг
11.03.2020
1878