Loading...
АСОСӢ
Шуъбаи робитаҳои байналмиллалӣ

Диданд: 1835

Шуъбаи робитаҳои байналмиллалӣ

Суроға: ш.Душанбе, хиёбони Рудаки 139
Тел.: (+992) 44 600 36 14, (+992) 919 23 20 08. interdep.tsmu.@gmail.com 
 

Таърихи Шуъба 

Шӯъбаи равобити байналмилалӣ (ШРБ) ҷузъи сохтории ДДТТ ба номи Абӯалӣ ибни Сино буда, ташкил ва ҳамоҳангсозии таълими шаҳрвандони хориҷӣ, аз ҷумла шаҳрвандони мамолики Иттиҳоди Давлатҳои муштаракулманофеъ, инчунин самтҳои гуногуни ҳамкориҳои байналмилалии донишгоҳро амалӣ месозад. Шӯъбаи  робитаҳои байналмилалӣ соли 1979 таъсис ёфтааст, ки тавассути он то имрӯз намояндагони зиёда аз 35 давлати дунё дар донишгоҳ таҳсил намуда.

         ШРБ дар баробари шӯъбаҳои дигари донишгоҳ дар самти таъмин намудани робитаҳои байналмилалии дутарафа ва бисёртарафа дар  соҳаи таҳсилоти олии тиббӣ фаъолият намуда, дар  итоати бевоситаи Ректори ДДТТ қарор дорад. ШРБ оид ба масъалахои ташкилӣ ва банақшагирӣ бевосита ба Ректори  донишгоҳ хисобот медихад. Сохтор, миқдор, бастҳои корӣ, тағйирот дар сохтор ва бастҳои кории шӯъбаро Ректори ДДТТ ба номи Абӯалӣ ибни Сино дар мувофиқа бо шӯъбаи банақшагирӣ ва молияи донишгоҳ тасдиқ мекунад. Кормандони ШРБ фаъолияти худро дар асоси дастурҳои инфиродии вазифавӣ ва Низомномаи фаъолияти шӯъба, ки аз тарафи  Ректори ДДТТ тасдиқ карда мешавад, ба роҳ мемонанд. Низомнома фаъолияти ШРБ-ро ба танзим дароварда, вазифаҳою мақсадҳо ва ҳуқуқу ӯҳдадориҳои онро муайян мекунад.

Ҳамкориҳои байналмилалӣ

Шӯъбаи робитаҳои байналмилалии ДДТТ ба номи Абӯалӣ ибни Сино дар самти ҳамкориҳо бо ташкилотҳои байналмилалӣ ва сафоратхонаҳои хориҷӣ дар кишвари мо кор бурда, барои инкишоф додани ин робитаҳо ҳаматарафа кӯшиш менамояд. Яке аз самтҳои муҳими фаъолияти шӯъбаи робитаҳои байналмилалӣ ин ба роҳ мондани робитаҳои судманд ва ҳамкориҳо бо сафоратхонаҳои кишварҳои хориҷӣ ва намояндагони ташкилотҳои байналмилалӣ, ки дар қаламрави Ҷумҳурии Тоҷикистон фаъолият мебаранд, мебошад. Дар ин самт шӯъба фаъолона кор бурда, аз ҷумла бо сафоратҳои Ҷумҳурии Исломии Эрон, Ҷумҳурии Исломии Покистон, Ҷумҳурии Исломии Афғонистон, Ҷумҳурии Ҳиндустон, Ҷумҳурии Халқии Чин, Ҷопон, Туркия, Туркманистон, Қазоқистон, Қирғизистон  ва ғайраҳо робитаҳои судмандро ба роҳ мондааст. Дар баробари ин дар айни ҳол бо як қатор ташкилотҳои байналмилалӣ ба монанди Ташкилоти Умумиҷаҳонии Тандурустӣ, Дафтари кории Швейтсария оид ба рушд, Лоиҳаи USAID «Тандурустии босифат», Ҷамъияти Олмон оид ба ҳамкории байналмилалӣ (GTZ), Фонди Глобалӣ, Фонди Сорос, DAAD, ТЕМПУС, МАГАТЭ, МНТЦ, UNFPA ва ғайраҳо ҳамкориҳои хуб ба роҳ монда шудааст. Дар чорчӯбаи ин ҳамкориҳо лоиҳаҳои сармоягузорӣ дар ташкил ва гузаронидани семинару симпозиумҳо, маблағгузории сафарҳои хизматии кормандони донишгоҳ амалӣ карда мешаванд. 

Шароити таҳсили шаҳрвандони хориҷӣ дар ДДТТ

ДДТТ ба номи Абӯалӣ ибни Сино рисолати тайёр намудани мутахассисони хориҷиро дар асоси қарори коллегияи Вазорати маорифи ҶТ, таҳти №7\9 аз 30 марти соли 2007 оид ба Қоидаҳои қабули шаҳрвандони хориҷӣ ва «Низомнома оид ба қабул ва таҳсили шаҳрвандони хориҷӣ дар ДДТТ», ки  дар Шӯрои олимони донишгоҳ тасдиқ карда шудааст, амалӣ мегардонад.

НИЗОМ, ШАРТҲОИ ҚАБУЛ ВА МӯҲЛАТИ ТАҲСИЛИ ШАҳРВАНДОНИ ХОРИҶӢ

1.     Қабули шаҳрвандони хориҷӣ ба ДДТТ ба номи Абӯалӣ ибни Сино тавассути сӯҳбат амалӣ мегардад; аъзои комиссияи қабул аз ҷумлаи намояндагони факултетҳо, кафедраҳои назариявӣ ва забонҳо, ки аз тарафи Ректори Донишгоҳ тасдиқ карда мешаванд, тартиб дода мешаванд.

Имтиҳонҳо барои қабул ба курси аввал то 28 август сурат мегирад.

Қабули шаҳрвандони хориҷӣ дар асоси фармони ректори ДДТТ пас аз гузаронидани сӯҳбат ва имзо намудани шартномаи дутарафа байни ректори ДДТТ ва шаҳрванди хориҷӣ ва пардохти пурраи маблағи муқарраргардидаи таҳсил то 30 октябр, сурат мегирад. Дар ҳолати вайрон намудани мӯҳлати муқарраршудаи пардохти маблағи таҳсил, шаҳрванди хориҷӣ аз сафи донишҷӯён хориҷ карда мешавад.

Баъд аз қабули расмӣ ба сафи донишҷӯён шаҳрвандони хориҷӣ бояд тамоми шартҳои шартномаи имзошударо иҷро намуда, барои риоя намудани тамоми қоидаҳои таҳсили донишҷӯён дар донишгоҳ саъйю кӯшиш намоянд. Шаҳрвандони хориҷӣ вазифадоранд, ки нисбати қонунҳои Ҷумҳурии Тоҷикистон эҳтиромона рафтор намуда, муқаррароти мавҷударо оид ба зиндагонии шаҳрвандони хориҷӣ дар Ҷумҳурии Тоҷикистон риоя намоянд.

2.     Таҳсили шаҳрвандони хориҷӣ ва ашхоси бетабаа дар ДДТТ ба номи Абӯалӣ ибни Сино дар асоси шартнома амалӣ мегардад:

  • тариқи пардохти шахсӣ;
  • пардохт аз тарафи ягон ташкилот, ё ин ки бо истифодаи дигар воситаҳо;
  • ба тариқи буҷавӣ тибқи квотаи байниҳукуматӣ мувофиқи дастурҳои махсуси Ҳукумати Ҷумҳурии Тоҷикистон;
  • мутобиқи шартномаи имзогардида байни ДДТТ ба номи Абӯалӣ ибни Сино ва Пуҳантуни тиббии Кобул, маблағи таҳсил барои шаҳрвандони Ҷумҳурии Исломии Афғонистон ба миқдори 25% кам карда шудааст.
  1. Дар шӯъбаи тайёрӣ шаҳрвандони хориҷӣ ба тариқи зайл ба таҳсил қабул карда мешаванд:
  • Мӯҳлати таҳсили 4 моҳа  –  бо арзиши 500 доллари  ИМА
  • Мӯҳлати таҳсили 8 моҳа  –  бо арзиши 1000 доллари  ИМА

Қабули шаҳрвандони хориҷӣ ба курсҳои тайёрии ДДТТ ба номи Абӯалӣ ибни Сино то 30 ок­тябр, танҳо пас аз пардохти пешакии маблағи таҳсил ва имзо гардидани шартнома барои муддати муайяншудаи таҳсил, амалӣ карда мешавад.

  1. Таҳсили тодипломии олии тиббӣ ва фармасевтӣ дар факултетҳои зерин ба роҳ монда шудааст:

  Факултет

Мӯхлати таҳсил

Маблағи таҳсил

(долл. ИМА)

 

Забони тоҷикӣ ва русӣ

Забони англисӣ

Факултети тиббӣ (мутахассис)

6 сол

3000

3500

Факултети тиббӣ

(бакалавр)

5 сол

3000

3500

Факултети стоматологӣ

5 сол

3000

-

Факултети фармасевтӣ

5 сол

3000

-

Факултети нигаҳдории тандурустии ҷомеа

5-6 сол

2000

-

 
  1. Таҳсил бо забонҳои зерин сурат мегирад:
  • Забони англисӣ (курсҳои 1-3)
  • Забони русӣ
  • Забони тоҷикӣ

Қабул ба гурӯҳҳое, ки дар онҳо омӯзиш бо забони англисӣ сурат мегирад, аз рӯи меъёри аз тарафи раиси комиссияи қабул муайянгардида, бо назардошти имконияти донишгоҳ дар ҳар соли таҳсил, амалӣ карда мешавад.  

Дар ҳолати донистани забони тоҷикӣ (форсӣ) шаҳрвандони хориҷӣ имконият доранд, ки пас аз супоридани имтиҳонҳои қабул тибқи муқаррароти умумӣ бе таҳсил дар шӯбаи тайёрӣ ба гурӯҳҳое, ки омӯзишашон бо забони тоҷикӣ сурат мегирад, дохил шаванд.

Шаҳрвандони хориҷие, ки хоҳиши таҳсил бо забони русӣ доранд, ба сафи донишҷӯён пас аз хатми шӯъбаи тайёрӣ, дар асоси натиҷаҳои имтиҳонҳои хатми шӯъбаи тайёрӣ қабул карда мешаванд.

ҲУҶҶАТҲОИ АСОСИЕ, КИ  БОЯД АЗ ТАРАФИ ШАҲРВАНДОНИ ХОРИҶӢ БА КОМИССИЯИ  ҚАБУЛИ ДДТТ ПЕШНИҲОД КАРДА ШАВАНД:

  • Аризаи шахсӣ ба номи ректор (анкета оид ба қабул ба таҳсил) бо нишондоди ихтисоси интихобшуда ва шакли таҳсил;
  • Ҳуҷҷати аслии таҳсилот, ки ба ҳуҷҷатҳои намунаи давлатии Ҷумҳурии Тоҷикистон оид ба таҳсилот баробар аст (Шаҳодатномаи баробарарзишӣ оид ба таҳсилот), бо натиҷаи баҳоҳо, тасдиқи тарҷумаи онҳо ба забони давлатӣ ва ё русӣ бо тартиби муқарраргардида;
  • Шаҳодатномаи намунаи муқарраршуда дар бораи бо муввафақият хатм намудани курсҳои тайёрии пеш аз муассисаҳои таҳсилоти олӣ ё шӯъбаҳои тайёрии яке аз муассисаҳои таҳсилоти олӣ, ки  ба рӯйхати расмии муассисаҳои таҳсилоти олии Ҷумҳурии Тоҷикистон дохил шудаанд, ки тайёрии пеш аз муассисаи таҳсилоти олии донишҷӯёни хориҷиро амалӣ мегардонад;
  • Маълумотномаи тиббии намунаи муқарраршуда, ки набудани бемории аломати масунияти бадан (СПИД)-ро шаҳодат медиҳад ва дар он  қайди махсус гузошта шуда, аз тарафи идораи расмии нигаҳдории тандурустӣ тасдиқ шудааст (маълумотномаи аслӣ пешниҳод карда шавад);
  • Ҳуҷҷат дар бораи таҳсилоти миёнаи умумии шаҳрвандони хориҷие, ки ба курси 1-ум дохил мешаванд;
  • Ҳуҷҷат дар бораи таҳсилоти пурра ва инчунин маълумотномаи академӣ (ва ё диплом) дар бораи таҳсилоти олии нопурра, ё диплом дар бораи таҳсилоти касбии зинаҳои гуногун барои дохилшавандагони курси 2-юм ва курсҳои минбаъда;
  • Нусхаи шиноснома бо раводид ва қайди амалкунанда (ҳангоми дар ҳудуди Ҷумҳурии Тоҷикистон будан), корти муҳоҷирӣ, 10 дона сурати  3х4 барои виза.    

Тамоми ҳуҷҷатҳое, ки ба комиссияи қабул пешниҳод карда мешаванд, бояд аввалан ба забони тоҷикӣ ва ё русӣ тарҷума карда шуда, аз тарафи мақомоти нотариалии Ҷумҳурии Тоҷикистон тасдиқ карда шуда бошанд. Шаҳодатномаи баробарарзишӣ оид ба таҳсилот, ки аз Вазорати маорифи Ҷумҳурии Тоҷикистон ба даст оварда мешавад, бояд ҳамроҳи дигар ҳуҷҷатҳо ба комиссияи қабули ДДТТ пешниҳод карда шавад.

  1. Таъмини тамдиди раводидҳо ва назорати воридшавии шаҳрвандони хориҷӣ

Дар бахши раводид ва ба қайд гирифтани донишҷӯён ва шаҳрвандони хориҷӣ дар ҳамкорӣ бо Вазорати корҳои хориҷии Ҷумҳурии Тоҷикистон ва Хадамоти муҳоҷирати Вазорати корҳои дохилии Ҷумҳурии Тоҷикистон робитаҳои судманд ба роҳ монда шудааст.

Ҳар як шаҳрванди хориҷӣ барои дохил шудан ба ДДТТ ба номи Абӯалӣ ибни Сино бояд аризаи худро ба номи ректори донишгоҳ пешниҳод намояд. Баъд аз қабул шудани ариза аз тарафи ректор, ШРБ ҳуқуқи фиристодани даъватномаро ба зимма мегирад. Дар асоси даъватнома тавассути Вазорати корҳои хориҷии Ҷумҳурии Тоҷикистон ва намояндагиҳои он дар хориҷи кишвар шаҳрвандони хориҷӣ раводиди (визаи) таҳсилӣ ба даст оварда, вориди Тоҷикистон мегарданд. Шаҳрвандони Руссия, Белоруссия, Қазоқистон ва Қирғизистон дар асоси шартномаҳои дутарафаи байниҳукуматӣ бе раводид вориди Тоҷикистон метавонанд гардид.

Бақайдгирӣ, назорат, таъмини тартиботи ҳаракат дар ҳудуди Ҷумҳурии Тоҷикистон ва дигар шароитҳои бадубоши шаҳрвандони хоричӣ дар Ҷумҳурии Тоҷикистонро ташкилотҳои қабулкунанда, яъне муассисаҳои таълимӣ бояд, ки дар асоси талаботи Қонуни Ҷумҳурии Тоҷикистон «Оид ба низоми ҳуқуқии шаҳрвандони хориҷӣ дар Ҷумҳурии Тоҷикистон», ки бо қарори Маҷлиси Олии Ҷумҳурии Тоҷикистон №231, аз 1-уми феврали соли 1996, «Қоидаҳои будубоши шаҳрвандони хориҷӣ дар Ҷумҳурии Тоҷикистон», ки бо Қарори Ҳукумати Ҷумҳурии Тоҷикистон № 218, аз 15-уми майи соли 1999 тасдиқ карда шудаанд, ба роҳ монда шудаанд.

Ҳуҷҷатҳои муҳассилини хориҷӣ ба Хадамоти муҳоҷирати ВКД ҶТ супорида шуда, барои онҳо қайди солона танзим карда мешавад. Барои донишҷӯёне, ки барқарор ва қабул шудаанд, қайдҳои муваққатӣ танзим  карда мешаванд. Мувофиқи қонун шаҳрвандони хориҷӣ вазифадоранд, ки дар мӯҳлати 3 рӯз (ба ғайр аз рӯзҳои истироҳатӣ)   ҳуҷҷатҳои худро барои пешниҳод намудан ба мақомотҳои дахлдор ба шӯъбаи робитаҳои байналмилалии донишгоҳ пешниҳод намоянд. Умуман барои дастрас намудани раводид ва ё дароз намудани мӯҳлати он аз тарафи шаҳрвандони хориҷӣ ҳуҷҷатҳои зерин бояд пешниҳод намуда шаванд:

  • Нусхаи шиноснома
  • 2 дона расми 5х6
  • 2 нусха корти бақайдгирӣ (замимаи 16) 
  • Маълумотномаи тиббӣ оид ба HIV/AIDS
  • Нусхаи дафтарчаи донишҷӯ
  • Нусҳаи дафтарчаи имтиҳонӣ
  • Нусхаи фармон оид ба қабул ба донишгоҳ
  • Нусхаи шартнома байни донишгоҳ ва шаҳрванди хориҷӣ

Сохтори ШРБ ДДТТ ба номи Абӯали ибни Сино

Сардори шӯъба

Додхоев Джамшед Саидбобоевич 

E-mail: interdep.tsmu@gmail.com

Сармутаҳассис

Эгамназаров Хусейн Назарович

E-mail: interdep.tsmu@gmail.com

Мутаҳассис

Хусейнова Шахноза

E-mail: interdep.tsmu@gmail.com

Методист оид ба раводид

Муродова Гулчахон

E-mail: interdep.tsmu@gmail.com

Котиба

Иматшоева Сайера

E-mail: interdep.tsmu@gmail.com

Ҷумҳурии  Тоҷикистон,  734003 ш. Душанбе,  Хиёбони Рӯдакӣ, 139

 тел: (+992 37) 224 45 83;факс: (+992 37) 224 36 87

E-mail: interdep.tsmu@gmail.com;www.tajmedun.tj